Yaşamın mənasıdır
Doyğular adasıdır
Yar mənim dənizimin
Lap gözəl qayasıdır
یاشامین معناسى دیر
دویغولار آداسی دیر
یار منیم دنیزیمین
لاپ گؤزل قایاسی دیر

بیری وارکی پری دیر
قهوه نین شکری دیر
آدی،یادی،قوخوسو
دیلیمین ازبری دیر
Biri var ki pəridir
Qəhvənin şəkəridir
Adı, yadı, qoxusu
Dilimin əzbəridir

یومورتا،یاغ قالمادی
داغ-داش،چؤل،باغ قالمادی
اوغرولارین الیندن
هئچ بیر شی ساغ قالمادی
Yumurta, yağ qalmadı
Dağ-daş,çöl , bağ qalmadı
Oğruların əllindən
Heç bir şey sağ qalmadı

گئنیش دیر آمما دار دیر
گئجه-گوندوزو تار دیر
هئچ بیر یولچوسو یوخدور
قلبیم ایزسیز دیار دیر
Genişdir amma dardır
Gecə-gündüz tardır
Heç bir yolçusu yoxdur
Qəlbim izsiz diyardır

اوره ییم آرام تاپیر
گؤزل گون-آخشام تاپیر
سنی قوجاغلایاندا
یاشامیم آنلام تاپیر
Ürəyim aram tapır
Gözəl gün-axşam tapır
Səni qocalığında
Yaşamım anlam tapır

سئوگی نین معناسی دیر
دردلرین آیناسی دیر
گوز یاشی آجیلارین
لاپ گؤزل ایمضاسی دیر
Sevginin mənasıdır
Dərdlərin aynasıdır
Göz yaşı acıların
Lap gözəl imzasıdır

بیری سنی سن ائدر
هر شئی له دوشمن ائدر
سونرا سنی ترک ائدیب
سنی ده سن دن ائدر
Biri səni sən edər
Hər şeylə düşmən edər
Sonra səni tərk edib
Səni də səndən edər

مظلوملارا دایاق اول
ظالیملره اوراق اول
یاشامین ساواشیندا
اؤزوندن گؤز قولاق اول
Məzlumlara dayaq ol
Zalımlara oraq ol
Yaşamın savaşında
Özündən göz-qulaq ol

شرابی،جامی یوخدور
سحر،آخشامی یوخدور
سئوگی سیز یاشاماغین
هئچ بیر آنلامی یوخدور
Şərabi,cami yoxdur
Səhər,axşamı yoxdur
Sevgisiz yaşamağın
Heç bir anlamı yoxdur

قیزیلیم گوموش اولدو
غم منله تای-توش اولدو
سن ده کوسوب  گئدندن
اومیدلاریم قوش اولدو
Qızılım gümüş oldu
Qəm mələ tay-tuş oldu
Sən də küsüb gedəndən
Ümidlərim quş oldu